السلام عليكم ورحمة الله وبركاته
ليت منهو وقع أوراق التقاعد****** والاداره وافـقـت والهــم زاحــــي
استلم كامل حقوقه والعوايد******* سلم العهـده وغادر واسـتراحــي
مانتظر حفلن توزع به شهايد ******* وصـور تذكـار مافيـهـا صلاحـــــي
اكتبواله نشكرك خدمتك واجد *********ونـتــمنى لك بدنيــاك النجاحــي
صار من عقب ارتباطه يابوعابد ******حـر مثـل الطيـر كفــاخ الجنـاحـي
ماحداه الزام عن بعض المقاصد *******لانــوى له ديــرة شــغل وراحـي
واصلن غاليه ولربعه معايــــد *******في اعياد الفطر واعياد الاضاحــي
لا زمه يقضيه وبكيفه يواعـــــد *******ما يراجـع ريسـه يبغى السماحـي
لا اشتهى يرقد تخير بالوسايد ******وان سهر ما هوجس بزام الصباحي
والهدف عند العرب ماهو بواحد ******كل رجـل له مـرام وله مشـاحـــي
من يبي يقنص عساه يعود فايد *****فيه بالمقنـاص رزق وانشــراحـــي
لاذكر في صحصح نزل وطرايـد ********قال هـيا مايقـول الصيـد نــاحـي
ومن تنيشط حالته جدد بناهـد *********ما فهـق لجـازته عقـد النـكاحــي
وكان حاله ماش والا ما يساعد ********ينسـدح ويكثـر مـن الانسـداحــي
وكان شفه بالسفر ماهو بناشد ********في بـلاد اللة مع السـياح ساحــي
وخيرهم من كان في دنياه زاهد *******يطلب الله بالثـبـات وبالصـلاحــــي
بين مكة والمدينة والمساجــــد ********دايـم دربـه عسى دربـه سـماحـي
قايم بالليل للرحمن ساجـــــد *********وكل ما نـادى المنـادي للفـلاحــي
قلتها وانا اعرف ارضاء الناس كايد***ولاني بفارض على الناس اقتراحي
والوظايف جمعت شتى البدايـــــد *****من جميع النـاس مجنون وصاحـي
فيهم الطيب عزيز النفس راكـــــد *******عل يفـدونه مشافيـح شحاحـــي
وفيهم الانـذال والرديــان تاجـد*********ـ خمـة دايـم سوالفهم صيـاحــــي
دايم وجه الردي واللاش بـــــارد *******ياعسى يمحـاه من دنيـاه ماحــي
والحظيظ اللي يبي يطلع تقاعــد ******دام به قـوة وقبل يقــال طـاحــــي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ
خل شيبان المنتدى يلحقون الباقي من عمارهم
دمتم بود
التقـــــــــــــــاعد
العرض العادي
